کراچی (رپورٹ : وقاراحمد ) پی سی بی کر کٹرز کیلیے خزانے کا منہ کھولنے کو تیار ہو گیا، بابر اعظم، محمد رضوان اور شاہین شاہ آفریدی جیسے ٹاپ کھلاڑیوں کو ماہانہ 45لاکھ روپے ریٹینر شپ فیس کی پیشکش کر دی گئی، میچ کھیلنے کی رقم الگ ہو گی ، دیگر کیٹیگریز میں کھلاڑیوں کے معاوضوں میں بھی خاطر خواہ اضافہ کیا جائے گا.
غیر ملکی لیگز کیلیے اے کیٹیگری کر کٹرز کو سال میں ایک این او سی دینے کی تجویز ہے، بی کو 2 جبکہ سی کو سالانہ تین لیگز میں شرکت کی اجازت ہو گی ، آئی سی سی سے ملنے والی رقم یا پی سی بی کے کنٹریکٹس سے حصہ دینے کا مطالبہ نہیں مانا گیا، بورڈ تین سالہ معاہدہ چاہتا ہے ، ٹیسٹ میچ فیس میں بھی بڑے اضافے کی تجویز سامنے آئی ہے تاکہ کھلاڑیوں کو اس فارمیٹ کی جانب راغب رکھا جا سکے۔
تفصیلات کے مطابق قومی کر کٹرز کے سینٹرل کنٹریکٹس کا30 جون کو اختتام ہو چکا، کھلاڑیوں نے پی سی بی کے سامنے کچھ مطالبات رکھے جس پر مذاکرات جاری ہیں، گذشتہ دنوں سری انکا میں بعض ٹاپ آفیشلز کی سینئر کر کٹرز سے ملاقات بھی ہوئی تھی، حال ہی میں کرکٹ پاکستان کو انٹر ویو میں چیئر مین مینجمنٹ کمیٹی ذکا اشرف نے کہا تھا کہ کھلاڑی ہیں تو بورڈ ہے ، وہ چاہتے ہیں ان کو اچھا معاوضہ ملے تاکہ مزید دل لگا کر ٹیم کیلیے کھیلیں، ذرائع نے بتایا کہ پی سی بی کر کٹرز کے معاوضوں میں غیر معمولی اضافہ کرنے پر آمادہ ہو گیا ہے.
تینوں طرز کی کرکٹ کھیلنے والے ٹاپ کر کٹر ز بابر اعظم، محمد رضوان اور شاہین شاہ آفریدی کو ماہانہ 45 لاکھ روپے ریٹینر شپ فیس کی پیشکش کر دی گئی، سابقہ کنٹریکٹ کے تحت ریڈ بال پلیئر ز کا ماہانہ معاوضہ ساڑھے 10 لاکھ اور وائٹ بال کا ساڑھے 9لاکھ تھا، دیگر کیٹیگریز میں کھلاڑیوں کے معاوضوں میں بھی خاطر خواہ اضافہ کیا جائے گا، غیر ملکی لیگز کیلیے اے کیٹیگری کر کٹرز کو سال میں ایک این او سی دینے کی بات ہوئی ہے، بی کو 2 جبکہ کسی کو سالانہ تین لیگز میں شرکت کی اجازت ہو گی، آئی سی سی سے ملنے والی رقم یا پی سی بی کے کنٹریکٹس سے حصہ دینے کا مطالبہ نہیں مانا گیا، بورڈ تین سالہ معاہدہ چاہتا ہے تاکہ ہر سال تجدید کے وقت اختلافات سامنے نہ آئیں، ٹیسٹ میچ فیس میں بھی بڑے اضافے کی تجویز سامنے آئی ہے تاکہ کھلاڑیوں کو اس فارمیٹ کی جانب راغب رکھا جائے، ساتھ دیگر ترغیبات بھی دی جائیں گی، گذشتہ برس فیس میں 10 فیصد اضافہ کیا گیا تھا، ٹیسٹ میچ فیس 8لاکھ 38 ہزار 530 ، ون ڈے انٹر نیشنل 5لاکھ 15 ہزار 696 جبکہ ٹی ٹوئنٹی انٹر نیشنل فیس 3لاکھ 72 ہزار 75 روپے تھی، تمام کیٹیگریز کے پلیئر ز کو یکساں فیس ملتی تھی ، اب اسے بڑھادیا جائے گا۔
حکام اس حقیقت سے واقف ہیں کہ آئی پی ایل میں عدم شرکت کی وجہ سے پاکستانی کرکٹر ز دنیا کے دیگر ٹاپ اسٹارز کی طرح کمائی نہیں کر پارہے ، سو فیصد ازالہ تو ممکن نہیں مگر بورڈ چاہتا ہے کہ ان کو بھی بڑی رقم دی جائے جس سے مالی آسودگی حاصل ہو ، ذرائع نے بتایا کہ کرکٹ ٹیکنیکل کمیٹی کے سربراہ مصباح الحق بھی کھلاڑیوں سے بات چیت کر رہے ہیں اور امید ہے جلد کوئی مثبت پیش رفت سامنے آئے گی ، یادر ہے کہ گذشتہ برس ریڈ اور وائٹ بال کے الگ معاہدے کیے گئے تھے، صرف بابر اعظم، محمد رضوان اور شاہین شاہ آفریدی ہی ریڈ اور وائٹ بال کی اے کیٹیگری میں شامل تھے ، حسن علی کی ریڈ میں بی اور وائٹ میں سی جبکہ امام الحق کی ریڈ میں سی اور وائٹ میں بی کیٹیگری تھی۔ اظہر علی کو صرف ریڈ جبکہ فخر زمان اور شاداب خان کو وائٹ بال کا اے کیٹیگری کنٹریکٹ دیا گیا تھا۔
